رمسيس الثاني وحبييته نفرتاري قصه حب من اجمل قصص الحب في مصر القديمه معبده الي بناه من اجمل واروع معابد العهد القديم والللي بيبين براعه المهندس المصرى وجمال التشييد المعماري في عهد الفرعون العاشق .
واجهة المعبد تضم أربعة تماثيل ضخمة للفرعون يصل طولها إلى 20 متر وجمب رجل التماثيل الضخمه هنلاقي تماثيل صغيره مبتزيدش في الارتفاع عن ركبتين رمسيس التماثيل دي لمراته الرئيسية نفرتاري ، والملكة الأم موتاي وكمان اولاده وبناته .
اما اللي بيميز المعبد وبيبين تفوقهم فى علم الهندسه وربطها بعلم الفلك ودا ان المعبد اتبني اساسه بطريقة أنه مرتين في السنة في 22 أكتوبر و21 فبراير تدخل أشعة الشمس جوه المعبد وينزل ضوء الشمس علي وش تمثال رمسيس فيظهر على الجدار الخلفي ، والتواريخ دى تواريخ عيد ميلاد الملك و يوم تتويجه وجلوسه علي العرش
نرجع بقا لنفرتاري زوجه وحبيبه رمسيس الوحيدة من زوجات رمسيس الثاني اللي بني لها معبد خاص بيها جنب معبده الكبير بابوسمبل وهو معبد حتحور.
ووصفها رمسيس و ابدع في الكلام عن محبوبته باجمل النقوش علي جدران المعبد ده و وصفها إنها ربة الفتنة والجمال وجميلة المحيا وسيدة الدلتا والصعيد .
أمام المعبد ده ستة تماثيل كبيره تقريبا ارتفاعها حوالي 10 متر أربعة تماثيل للملك رمسيس الثاني واقف وتمثالين لنفرتاري وحواليهم تماثيل صغيره لاولادهم رمسيس عمل حاجه مكنتش متداوله الفتره دى انه خلي حجم تماثيل نفرتاري في نفس حجم تماثيله والمعروف وقتها ان تماثيل الزوجه بتكون اصغر فى الحجم لكنه عمل كده تقدير وعرفان واعتراف بحبه الشديد لها .
